ليت الزمان يعود

عديت في راس الطويله وناديت

جريت باعلا الصوت محدن يردا

ياليتني في عالي الرجم ماجيت

اخفيت ماكنيت مابيح سدا

يابو عقل ضاقت هجوسي وغنيت

غنيت لي قافن بنيته علا الدا

ذكرت وقتن شتت الفكر تشتيت

وسمعت علمن بالمجالس يردا

يوم اتذكر ماضي الوقت ونيت

وانقد قلبي بين الاضلاع قدا

ليت الزمان يعود ياليت ياليت

ونجدد الذكرى وغيضي يهدا

وارجع لدارن فيه عشت وتربيت

دارن بها خضر الجرايد تجدا

خليل يومنك علا الضلع عديت

ماشفت لك ذيبن علا الضلع عدا

ذيين شجاع وبالمواقيف له صيت

وقول انا لك يا خليل اتحدا

لا ساكنن جحره ولا حطله بيت

الليل فالمرقاب والصبح مدا

ياذيب يومنك مع البر سجيت

ماشفت نزل البدو ياديب شدا

عن دارهم ياذيب قفو وانا اقفيت

غصبن علي ياذيب ماهو بودا

عن ديرت البدوان ياديب صديت

وانته منول للغنايم تصدا

وقتن مضا راس الطويله تغديت

واليوم اشوفك صايمن ماتغدا

واليوم ياذيب الخلا ويش سويت

ماعاد لك علمن مع الناس بدا

سلمت مفتاح الزعامه ونحيت

عن فعلك الماضي وتاريخ جدا

مدري عجز والا انت ياذيب ذليت

ماعاد لك فعلن مع الناس عدا

سج القدم واعزم علا ماتوريت

وخلك شجاع وحد الانياب حدا