នឹកម្នាក់ឈ្មោះចន្ទ្រ

I-​ចន្ទ្រចររះឆ្លង គងខ្នងដំបូល

​ព្រះសូរ្យយាងចូល ទីទែនជើងមេឃ

​​ ខ្នើតខិតរំកិល​ វិលចូលដំណេក

​ ​រនោចបិទភ្នែក ត្រៀមគ្រងតំណែង។

II-ទិវាហួសទៅ ដល់នូវរាត្រី

​​​​​ ស្អែកត្រៀមរស្មី វិលផ្លាស់សូរ្យសែង

ម្ដងថ្ងៃម្តងយប់ ឥតឈប់កន្លែង

ឯខ្ញុំចំបែង ថ្លែងប្រាប់មិនត្រូវ។

R-តាមពិតនឹកចន្ទ្រ ធ្លាប់កាន់ដៃគ្នា

កើយភ្លៅសន្ទនា អធ្រាត្រយប់ជ្រៅ

ចន្ទ្រឈ្មោះបងចាំ ខែឆ្នាំផុតទៅ

ឱ! ចន្ទ្រពាលពៅ នឹកបងវិញទេ?

III-ដ្បិតខ្នើតរនោច ដូចចន្ទ្រនិងបង

មិនដូចបំណង ផ្សងគូបុព្វេ

ចិត្តនៅតែនឹក ចន្ទ្រាមាសមេ

មិនដែលភ្លេចទេ ទោះចន្ទ្រលែងរះ។